Iblagh News | حقائق تک رسائی اور ان کا ابلاغ
کویت سٹی:گزشتہ روز خلیجی ریاست کویت نے فلسطینی عوام کے لیے فوری امدادی مہم شروع کرنے کا اعلان کیا ہے۔ کویتی حکومت نے شہریوں اور امدادی تنظیموں سے اپیل کی ہے کہ وہ جنگ زدہ فلسطینیوں کے لیےبڑھ چڑھ کر امداد فراہم کریں۔کویتی وزارت برائے سماجی امور کے سرکاری ترجمان احمد العنزی نے کہا کہ "سماجی امور، خاندانی اور امور اطفال کے وزیر الشیخ فراس الصباح کی ہدایات کی بنیاد پر فلسطین میں حالیہ اسرائیلی غارت گری کے دوران متاثر ہونے والے فلسطینیوں کے لیے امداد جمع کرنے کی مہم شروع کی گئی ہے۔
العنزی نے ایک پریس بیان میں مزید کہا کہ "مہم میں حصہ لینے کے خواہشمند خیراتی ادارے اور فاؤنڈیشنز کے امداد کی فراہمی کے لیے پیشگی منظوری حاصل کر سکتے ہیں۔”گذشتہ روز درجنوں کویتی شہری مجلس امہ [پارلیمنٹ] کے سامنے الارادہ اسکوائر میں فلسطینیوں کے ساتھ اظہار یکجہتی کے لیے جمع ہوئے۔
انہوں نے فلسطینی مزاحمت کاروں کی طرف سے اسرائیلی جرائم کے خلاف شروع کیے گئے ’طوفان الاقصیٰ‘ کی حمایت کا اعلان کیا۔
شرکاء نے ہاتھوں میں بینرز اٹھا رکھے تھے جن پر فلسطینی مزاحمت کی حمایت میں نعرے درج تھے۔انہوں نے اسرائیل کے ساتھ تعلقات کے قیام کو مسترد کرتے ہوئے اسرائیلی ریاست کے بائیکاٹ کی حمایت کی۔
