پاکستانی وزیر اعظم کی سعودی ولی عہد سے ملاقات، غزہ سیز فائر کے لیے عالمی تعاون پر زور

ریاض:نگران وزیراعظم انوار الحق کاکڑ نے ہفتے کو مشترکہ عرب اسلامی سربراہی اجلاس کے موقعے پر سعودی عرب کے ولی عہد شہزادہ محمد بن سلمان سے ملاقات میں غزہ پر اسرائیلی جنگ سمیت اہم موضوعات پر بات کی۔
وزیر اعظم آفس سے جاری بیان میں کہا گیا کہ دونوں رہنماؤں نے غزہ اور مغربی کنارے میں فلسطینیوں کے خلاف اسرائیلی قابض افواج کی جارحیت کے باعث پیدا ہونے والی تازہ ترین صورت حال پر تبادلہ خیال کیا۔

وزیر اعظم پاکستان نے خادم حرمین شریفین اور ولی عہد شہزادہ محمد بن سلمان کی قیادت میں فلسطین کاز کے فروغ کے لیے سعودی عرب کے کردار اور کاوشوں کو سراہا۔

انہوں نے مقبوضہ فلسطینی علاقوں کی بگڑتی ہوئی صورت حال پر مشترکہ عرب اسلامی لائحہ عمل تشکیل دینے کے سلسلے میں سربراہی اجلاس کے بروقت انعقاد پر سعودی قیادت کا شکریہ ادا کیا۔

دونوں رہنماؤں نے محصور اور بے گناہ فلسطینیوں کے خلاف اسرائیل کو وحشیانہ اور اندھا دھند جارحیت سے روکنے کے لیے فوری بین الاقوامی تعاون کی ضرورت پر زور دیا۔

انہوں نے مقبوضہ غزہ کی ناکہ بندی ختم کرنے کی فوری ضرورت پر بھی زور دیا تاکہ متاثرہ آبادی کو اہم انسانی امداد اور طبی امداد کی فراہمی آسان بنائی جاسکے۔

وزیر اعظم نے ہسپتالوں، پناہ گزین کیمپوں، سکولوں اور رہائشی عمارتوں پر بمباری کے اسرائیلی اقدام کی مذمت کی جس کے نتیجے میں 10 ہزار سے زائد قیمتی جانوں کا نقصان ہوا۔

انہوں نے 1967 سے پہلے والی سرحدوں پر ایک آزاد، خودمختار اور قابل عمل فلسطینی ریاست کے قیام، جس کا دارالحکومت القدس الشریف تھا، پر زور دیا۔

وزیر اعظم نے اسرائیل فلسطین تنازعے کے منصفانہ اور پائیدار حل کے لیے پاکستان کے غیر متزلزل عزم کو بھی اجاگر کیا۔

دونوں رہنماؤں نے دوطرفہ امور پر بھی تبادلہ خیال کیا اور باہمی فائدہ مند اقتصادی شراکت داری کے لیے دیرینہ پاکستان اور سعودی تعلقات کو مزید مستحکم کرنے کے عزم کا اعادہ کیا۔